പുതപ്പുരിയപ്പെട്ട
രാതികള്‍
പുതച്ചുകിടത്തിയ
പകലുകള്‍
അതെ,
അതൊരു-
പുതപ്പു മാത്രമായിരുന്നു
കലാപങ്ങളെ
ഇങ്ങനെയും എഡിറ്റു ചെയ്യാം
2014 മേയ് 30, വെള്ളിയാഴ്‌ച
നാരങ്ങമിഠായി ഉണ്ടാക്കുന്ന വിധം
പുതപ്പുരിയപ്പെട്ട
രാതികള്‍
പുതച്ചുകിടത്തിയ
പകലുകള്‍
അതെ,
അതൊരു-
പുതപ്പു മാത്രമായിരുന്നു
കലാപങ്ങളെ
ഇങ്ങനെയും എഡിറ്റു ചെയ്യാം
ഇങ്ങനെയും ചിതയൊരുക്കാം
അവര്‍
പൂട്ട് പൊളിച്ച്‌ അകത്തു കയറുകയോ
തേടിവന്ന് വാതിലില്‍ മുട്ടുകയോ
ചെയ്തിരുന്നില്ല;
നമ്മള്‍
അന്വേഷിച്ചു കണ്ടെത്തുകയായിരുന്നു
അതിനാല്‍
ഈയാമ്പാറ്റകളെ
ഇനിമുതല്‍
വിഡ്ഢികളെന്ന് വിളിക്കരുത്
2014 മേയ് 8, വ്യാഴാഴ്‌ച
കുപ്പായമില്ലാത്ത കാലത്ത്...
കുപ്പായങ്ങള്‍
നരക്കും
കീറും
അഴിക്കാത്തപക്ഷം
താനേ അഴിയും
അതിനാല്‍
കുപ്പായങ്ങള്‍ തമ്മിലുള്ളതിനെ
ഞാന്‍ പ്രണയമെന്നു വിളിക്കുന്നില്ല
കുപ്പായമില്ലാത്ത ഞാന്‍
കുപ്പായമിട്ട നീന്നോടൊപ്പമില്ലെങ്കിലും
കുപ്പായമില്ലാത്ത നീ
കുപ്പായമിട്ട എന്നോടൊപ്പമില്ലെങ്കിലും
ഞാനതിനെ
വിരഹമെന്നും വിളിക്കില്ല
കുപ്പായമില്ലാത്ത കാലത്ത്
നാമിരുവരുമൊന്നിച്ചൊരു-
പൂവിന്റെ
കണ്ണില്‍ നോക്കിയിരിക്കുകയാണെങ്കില്‍
മറ്റാരെങ്കിലുമതിനെ
പ്രണയമെന്നു വിളിക്കട്ടെ
2014 ഏപ്രിൽ 22, ചൊവ്വാഴ്ച
ഒമര്‍ ഖയ്യാമിന് ഒരു കുടിയൊഴിപ്പിക്കല്‍ നോട്ടീസ്‌
ഒമര്‍ ഖയ്യാം
നീ ഇപ്പോള്‍
പടിയിറങ്ങണം
എന്റെ
ആര്‍ത്തിയും ആസക്തിയും
നിര്‍വ്വീര്യമാക്കി
ഇനിയും നിന്നെ സഹിക്കാന്‍
എനിക്കാവില്ല
പൂമുഖത്തെ
കസേരയിലോ കണ്ണാടിക്കൂട്ടിലോ
എത്രകാലം വേണമെങ്കിലും
നിനക്ക് അലങ്കാരമാകാമായിരുന്നു
പക്ഷെ; നീ
അക്കങ്ങള്‍ മാത്രം വേവുന്ന
എന്റെ അടുക്കളയില്‍
പ്രണയത്തിന്റെ അടുപ്പുകൂട്ടി
ശീതീകരിച്ചതും മാംസളവുമായ
എന്റെ കിടപ്പറ
വിരഹത്തിന്റെ വറചട്ടിയാക്കി
കണ്ണുരുട്ടുന്നവന്റെ
തലയെടുക്കാന്‍ കരുതിവെച്ച
വെടിമരുന്നു നീ
വീഞ്ഞാക്കി മാറ്റി
എന്നെ കുടിപ്പിച്ചു
ഉന്മത്തനായ ഞാനിന്ന്
ഒരു വെടിക്കു
മരുന്നില്ലാത്തവന്‍
ഒമര്‍ ഖയ്യാം
ഇത് എന്റെ മാത്രം വീടാണ്
നീ ഇനിയും പുറപ്പെടാത്ത പക്ഷം
പാളം തെറ്റിയ ഒരു തീവണ്ടിയോട്
ഇതുവഴി വരാന്‍ ഞാന്‍ പറയും
2014 ഏപ്രിൽ 20, ഞായറാഴ്‌ച
കണ്ണാടി
ആഴങ്ങളില്‍
ഒരു ആകാശമുണ്ടായിരിക്കണം
അവിടെ
നിലാവും നക്ഷത്രങ്ങളുമുണ്ടായിരിക്കണം
വേരുകള്‍ യാത്രപോകുന്നത്
അങ്ങോട്ടേക്കായിരിക്കണം
ഉയരങ്ങളില്‍ നിന്ന്
ശിഖരങ്ങളെ മോഹിപ്പിക്കുന്നത്
അതിന്റെ
പ്രതിബിംബമായിരിക്കണം
2014 ഏപ്രിൽ 14, തിങ്കളാഴ്‌ച
വേനല്‍ നനയുമ്പോള്‍
വേനല്‍മഴയെ
പഴിക്കരുത്
ആകസ്മികം
എന്നു വിളിക്കരുത്
അത്
അധീനപ്പെടാത്ത
കാടുകളോടുള്ള
ആകാശത്തിന്റെ
വാഗ്ദാനമാണ്
അതിനാല്‍
ആ പൂക്കളൊന്നും
യാദൃച്ഛികമല്ല
2014 ഏപ്രിൽ 2, ബുധനാഴ്‌ച
കവിയെ കൊല്ലുമ്പോള്‍ ശ്രദ്ധിക്കേണ്ട കാര്യങ്ങള്‍
കവിയെ കൊല്ലുന്നതിന് മുമ്പ്
കാറ്റിനെ പിടിച്ചുകെട്ടണം
സൂര്യനെ മുഖപടമണിയിക്കണം
നദികള്‍ വറ്റിക്കണം
മഴയെ ഭൂമികടത്തണം
മണ്ണിനെ വന്ധീകരിക്കണം
തൂക്കുകയോ
വെട്ടുകയോ
വെടിവെക്കുകയോ ആവാം
പക്ഷെ;
ഒറ്റ വിത്തും
തെറിച്ചു പോയിട്ടില്ലെന്ന്
വീണ്ടും വീണ്ടും
ഉറപ്പുവരുത്തണം
കാറ്റിനെ പിടിച്ചുകെട്ടണം
സൂര്യനെ മുഖപടമണിയിക്കണം
നദികള്‍ വറ്റിക്കണം
മഴയെ ഭൂമികടത്തണം
മണ്ണിനെ വന്ധീകരിക്കണം
തൂക്കുകയോ
വെട്ടുകയോ
വെടിവെക്കുകയോ ആവാം
പക്ഷെ;
ഒറ്റ വിത്തും
തെറിച്ചു പോയിട്ടില്ലെന്ന്
വീണ്ടും വീണ്ടും
ഉറപ്പുവരുത്തണം
2014 ഫെബ്രുവരി 4, ചൊവ്വാഴ്ച
നിലാവുദിക്കുമ്പോള്‍...
തടാകത്തിലകപ്പെട്ട
പ്രണയം പോലെ
ഈ നഗരം
കാറ്റിന്റെ-
മണം മാറും മുമ്പേ
കാക്കകള്‍
ഉണരും മുമ്പേ
നമുക്ക്
രണ്ടു നദികളാവണം
വാഗ്ദാനങ്ങളില്ലാതെ
യാത്ര തുടരണം
2014 ഫെബ്രുവരി 1, ശനിയാഴ്‌ച
ഒരേ തൂവല്‍ ശബ്ദങ്ങള്‍
ഒരു ഇറച്ചിവല്‍പനക്കാരി
വാലിട്ടെഴുതിയ
മിഴികൊണ്ടെന്തോ
മൊഴിയുമ്പോഴും
പക്ഷികള്ചിലക്കുമ്പോഴും
പൂച്ചകള്‍
കരയുമ്പോഴും
മരങ്ങള്‍
ഇലപൊഴിക്കുമ്പോഴും
പതാക വാഹകര്‍
ഇന്ക്വിലാബിനോ
ഇന്ദിരക്കോ
ഭാരത് മാതാവിനോ
ജയ് വിളിക്കുമ്പോഴും
കമ്പിളി വില്‍പനക്കാരനും
മീന്‍കാരനും
തൊണ്ട കീറുമ്പോഴും
വിശുദ്ധ വസ്ത്രധാരികള്‍
ഓം ശാന്തി
അല്ലാഹു അക്ബര്‍
ഹലേലുയ്യാ
നീട്ടിപ്പാടുമ്പോഴും
ഒരു ആംബുലന്‍സ്
സൈറണ്‍ മുഴക്കി
ചീറിപ്പാഞ്ഞു പോകുമ്പോഴും
ഞാന്‍ കേള്‍ക്കുന്നത്
അതെ
അതു മാത്രമാണല്ലോ
2014 ജനുവരി 31, വെള്ളിയാഴ്‌ച
വൃത്തം
കൊടുത്തയച്ചതാണ്
കിട്ടിയത്
പറഞ്ഞത്‌ നീയോ
കേട്ടത് ഞാനോ
അല്ല
അങ്ങനെയല്ലെങ്കില്‍
കൊടുത്തയച്ചതും
കൊണ്ടുവന്നതും
ഏറ്റുവാങ്ങിയതും
ഞാന്‍ തന്നെ
2014 ജനുവരി 30, വ്യാഴാഴ്‌ച
ഒരു മുസാഫിറിന്റെ മൊഴി
സഹയാത്രികാ
ഈ വളവില്‍ വച്ചോ
അല്ലെങ്കില്‍
അടുത്ത തിരിവില്‍ വച്ചോ
നമ്മള്‍ വഴി പിരിയും
നീ പിന്നെയും
യാത്ര തുടരുമ്പോള്‍
എന്റെ ശവമഞ്ചം
വഹിക്കരുത്
ആരെങ്കിലും
എന്നെക്കുറിച്ചു ചോദിച്ചാല്‍
കൂട്ടത്തെ
നഷ്ടപ്പെടുത്തിയവനെന്നോ
ഒഴിഞ്ഞ പാത്രമെന്നോ പറയുക
ദരിദ്രനായിരുന്നു എന്നുമാത്രം പറയരുത്
എന്റെ നോട്ടങ്ങളില്‍
എഴുതാത്തതെന്തെങ്കിലും
വായിച്ചിട്ടുണ്ടെങ്കില്‍
മായ്ച്ചുകളയണമെന്ന്
നീ അവളോടു പറയണം
ഞാന്‍ ഒരു പൂ പോലും
പറിച്ചിരുന്നില്ല
2014 ജനുവരി 29, ബുധനാഴ്‌ച
മാഞ്ഞുതീരുന്നത്
ഞാന്‍ എന്നെ
ഒരു കടലാസില്‍ പകര്‍ത്തി
പലവട്ടം വായിച്ചു
വായിക്കുന്തോറും തിരുത്തി
തിരുത്തുന്തോറും വെട്ടി
ഒടുവില്‍
വെട്ടും തിരുത്തും
മായ്ച്ചുകളഞ്ഞപ്പോള്‍
കടലാസ് ശൂന്യം
2014 ജനുവരി 28, ചൊവ്വാഴ്ച
ദൈവത്തിന്റെ മണം
നീ
അരികിലെത്തുമ്പോള്‍
ഞാന്‍ ശ്വസിക്കുന്നു
നിന്റെ
അടുക്കളയും
കിടപ്പറയും
കുളിമുറിയും
അണ്ഡബീജസങ്കലന
പ്രവാഹങ്ങളും
ദൈവത്തിന്റെ
മണം മാത്രം
എങ്ങുപോയ്
മൂക്കേ?
ഓ
നിനക്കും
ആ മണം
അറിയില്ലല്ലോ...ആ മണം
2014 ജനുവരി 27, തിങ്കളാഴ്‌ച
അടയുമ്പോള്‍...
മുട്ടരുതെന്ന്
ഞാന്‍ എന്നോട്
പലവട്ടം പറഞ്ഞിരുന്നു
എന്നിട്ടും മുട്ടിപ്പോയി
മുട്ടുമ്പോള്‍
അടയപ്പെടുമെന്ന്
മനസ്സിലായത്
അങ്ങനെയാണ്
അടഞ്ഞുപോയത്
തുറക്കപ്പെട്ടത്‌
2014 ജനുവരി 22, ബുധനാഴ്‌ച
രണ്ടു സ്വപ്‌നങ്ങളും ഒരു യാഥാര്‍ത്ഥ്യവും
കഴിഞ്ഞദിവസം
എന്റെ വാഹനത്തിന്റെ
ഇന്ധന ടാങ്കിന്
ഓട്ട വീണു
പുതിയതു വാങ്ങി
ഇന്നലെ
വലിച്ചുമുറുക്കുമ്പോളെന്റെ
അരപ്പട്ട പൊട്ടി
അത്
തുന്നിച്ചേര്‍ത്തു
ഇന്ന്
ഞാനൊരു സ്വപ്നം കണ്ടു:
തെരുവില്‍
സമരക്കാര്‍
കൂട്ടംകൂടി നില്‍ക്കുകയായിരുന്നു
അവരാരും
വസ്ത്രം ധരിച്ചിരുന്നില്ല
പൊരുളറിയാത്ത
ആ മര്‍മ്മരങ്ങള്‍
ഇവിടെ
ചേര്‍ത്തെഴുതുമ്പോഴും
ഞാന്‍ മരിച്ചിരുന്നില്ല
2014 ജനുവരി 21, ചൊവ്വാഴ്ച
ആയുധം
അവെളെന്നോടു
കുപ്പായം
അഴിക്കാന്‍
ആവശ്യപ്പെട്ടപ്പോള്‍
ഞാന്‍
അടിവസ്ത്രം പോലും
പറിച്ചെറിഞ്ഞു
കണ്ണട മാറ്റാന്‍
പറഞ്ഞപ്പോള്‍
കണ്ണുകള്‍ തന്നെ
വേണ്ടെന്നു വച്ചു
ഒടുവില്‍
ആലിംഗനത്തിന്റെ
അന്ത്യയാമത്തില്‍
ചെവിവള്ളിയിലൊരു
ചുംബനമര്‍പ്പിക്കാന്‍
ചുണ്ടു ചേര്‍ക്കവെ
അവളെന്റെ കാതില്‍
മെല്ലെ പറഞ്ഞു:
വൃഷ്ണസഞ്ചിയുടെ
തെക്കേമൂലയില്‍
ചൊറിപിടിച്ച
പാടുള്ളവനേ
എനിക്കു
ഓക്കാനം വരുന്നു.
2014 ജനുവരി 20, തിങ്കളാഴ്‌ച
മൗനം ഒരു വിജനതയല്ല
എനിക്കീ-
വിജനതയുടെ
മലയിറങ്ങണം
ഏകാന്തതയുടെ
സിംഫണിയില്‍ നിന്ന്
ബധിരനാവണം
ധ്യാനിക്കുമ്പോള്‍
ഒറ്റക്കാവണം
താഴ്‌വരയിലൊരു-
നഗരമുണ്ടായിരിക്കണം
ആള്‍ക്കൂട്ടമുണ്ടാവണം
അതിനിടയിലൊരു
മൗനമാകണം
2014 ജനുവരി 6, തിങ്കളാഴ്‌ച
പൂക്കളുടെ ശ്മശാനം
അറുത്തുമാറ്റിയതൊന്നും
പൂക്കളല്ലാത്തതിനാല്‍
ആദ്യരാത്രികളെ ഞാന്‍
പൂക്കളുടെ-
ശ്മശാനമെന്നു വിളിക്കുന്നു
പരസ്പരം
കാത്തുവച്ച
കസ്തൂരി മാമ്പഴം
കാക്ക കൊത്തിയ കാര്യം
ഇനി മിണ്ടരുത്
നീലത്തിമിംഗലം കണ്ണുവച്ച
കുഞ്ഞു സ്രാവിനെ
നീപിടിച്ചു കൊണ്ടുപോയി
പൊരിച്ചു തിന്നില്ലേ...
2014 ജനുവരി 2, വ്യാഴാഴ്‌ച
പൂക്കള്‍ പറിക്കാതിരിക്കുമ്പോള്‍
ആദ്യരാത്രിയിലെ പൂക്കള്‍
കിടക്കവിരിയില്‍
ഞെരിന്നമര്‍ന്ന്
ചീഞ്ഞുനാറാന്‍ തുടങ്ങിയപ്പോഴാണ്
പൂക്കാരന്‍മുക്കിലേക്കു പോയത്
അവിടെ
നിരനിരയായ് വച്ച കുട്ടകളില്‍
പലതരം പൂക്കളുണ്ടായിരുന്നു
അവ മലര്‍ന്നു കിടന്നു
പുഞ്ചിരിക്കാന്‍
പരാജയപ്പെട്ടുകൊണ്ടിരുന്നു
അപ്പോള്‍
ശവഗന്ധം വഹിച്ച
ഒരു കാറ്റ്
അതിലെ കടന്നു പോയി
അറിയാത്ത വഴികള്‍ പിന്നിട്ട്
ഒടുവില്‍ എത്തിച്ചേര്‍ന്നത്
ആ പഴയ ഉദ്യാനത്തിലായിരുന്നു
ആ പൂവ് അപ്പോഴും
അവിടെ ഉണ്ടായിരുന്നു
അതിന്റെ പേര്
പൂവ് എന്നുതന്നെയായിരുന്നു
2014 ജനുവരി 1, ബുധനാഴ്‌ച
ഒരു പെണ്ണ് മുന്നില്‍ നടക്കുമ്പോള്‍...
പെണ്ണേ
നിനക്കെന്നെ അറിയില്ല
എന്നിട്ടും
എനിക്കഭിമുഖമായി
നീ നടന്നുവരുമ്പോള്‍
തട്ടത്തിന്റെ തലയെടുത്ത്
മുലമുഖത്തിട്ട്
എന്റെ മനസ്സു വായിച്ചതില്‍
ഞാന്‍ ആശ്ചര്യപ്പെടുന്നില്ല
പെണ്ണേ
നിനക്ക് പിന്നില്‍ കണ്ണുകളില്ല
എന്നിട്ടും
നീ എന്റെ മുന്നില്‍ നടക്കുമ്പോള്‍
എന്റെ നോട്ടങ്ങളും
നിന്റെ താളത്തിനൊത്ത്
എന്റെ ഹൃദയത്തിലുണരുന്ന
നൃത്തവും
നീ കാണുന്നത്
ഏതു കണ്ണുകൊണ്ടാണ്?
ഈ ചോദ്യത്തിന്
നീ ഉത്തരം നല്‍കിയാല്‍
എന്റെ
എല്ലാ ചോദ്യങ്ങള്‍ക്കുമുള്ള
ഉത്തരം
ഞാനതില്‍ വായിക്കും
നല്ല വിത്ത്
ഞാന്‍
എന്നോടു തന്നെ
വെറുതെ
ഒരു കാര്യം
പറയുകയാണ്:
ദു:ഖങ്ങളൊന്നും
പങ്കുവെച്ച്
നശിപ്പിക്കരുത്
ഹൃദയത്തില്‍
ഒരു കുഞ്ഞു ഖബറുണ്ടാക്കി
നല്ല വെള്ളത്തുണിയില്‍
പൊതിഞ്ഞ്
അടക്കം ചെയ്യുക
ശേഷം
അതിന്റെ
പതിനാറടിയന്തിരവും
ആണ്ടും
മറക്കാന്‍ കഴിഞ്ഞാല്‍
അതിനേക്കാള്‍
നല്ല വിത്ത്
വേറെ ഇല്ല
2013 ഡിസംബർ 30, തിങ്കളാഴ്‌ച
നീ അരികിലുള്ളപ്പോള്‍
ഞാന്‍ കടല്‍തീരത്ത്
പോകുന്നില്ല
കലണ്ടര്‍
നോക്കുന്നില്ല
നിന്റെ കണ്ണുകളില്‍-
കാണുന്നു
കടലും കാലവും
നീ ഇമയനക്കുമ്പോള്‍
ഞാന്‍ ശിശിരമാകുന്നു
ഞാന്‍ ശിശിരമാകുന്നു
വസന്തം
പൂ ചൂടുന്നു
ആ മിഴികള്‍
അടയരുതേ
ഞാന്‍
അന്ധനായിപ്പോകും
2013 ഡിസംബർ 21, ശനിയാഴ്‌ച
കടല്‍ ഒരു ശ്മശാനമല്ല
നദികളേ
പുഴകളേ
അരുവികളേ
ഓരോ തിരയിലും
നിങ്ങളുടെ
നൃത്തച്ചുവടുകളറിയുമ്പോള്‍
ഞാന്‍
തിരുത്തുന്നു:
കടല്‍
ഒരു ശ്മശാനമല്ല
2013 ഡിസംബർ 19, വ്യാഴാഴ്‌ച
ഒഴുകാന്‍ കൊതിക്കുന്നവന്റെ പ്രാര്‍ത്ഥന
കുമ്പസാരക്കൂടുകള്‍
ചീഞ്ഞുനാറുമ്പോള്‍
അണക്കെട്ടുകള്‍ക്ക്
വീര്‍പ്പുമുട്ടുമ്പോള്‍
പ്രളയമേ
നീയാണെന്റെ-
പ്രണയിനി
2013 ഡിസംബർ 15, ഞായറാഴ്‌ച
സമയമാകുമ്പോള്‍...
വാതിലുകളെല്ലാം
ചുമരുകളായല്ലോ
വഴികളെല്ലാം
മാഞ്ഞുപോയല്ലോ
ഞാന്‍
പുറപ്പെടുകയാണെന്നു
തോന്നുന്നു
2013 ഡിസംബർ 5, വ്യാഴാഴ്‌ച
നദീതടങ്ങളില്‍...
1
ഞാന്‍
നിന്നിലേക്കൊരു
പാലം
പണിയാനിരിക്കെയാണ്
നമുക്കിടയിലെ പുഴ
വറ്റിയത്
2
നീ
പാതിമയക്കത്തില്‍
കാണാതായ മയില്‍പ്പീലി തിരയുമ്പോള്‍
ഞാന്‍
നാലുവരിപ്പാത വിഴുങ്ങിയ ഇടവഴിയുടെ
ഇലഞ്ഞിപ്പൂമണമുള്ള
മൂന്നാമത്തെ വളവിലായിരുന്നു
3
ഞാനും നീയും ഇല്ലാത്ത
കാലത്തിലേക്കായിരുന്നു
പുറപ്പെട്ടത്
എത്തിച്ചേര്‍ന്നിടത്താകട്ടെ
നീ മാത്രം
4
നീല്‍ ആംസ്‌ട്രോംഗ്
ചന്ദ്രനില്‍ പാറയാണെന്ന്
കണ്ടെത്തുന്നതിനുമുമ്പ് തന്നെ
ഞാനവളെ
നിലാവേ
എന്നു വിളിച്ചിരുന്നു
5
ഒരു മുറിക്കുള്ളില്‍
ഒറ്റമരമാവാന്‍ പോയവര്‍
പുണര്‍ന്നു പുണര്‍ന്നു
പല മരങ്ങളായി
6
ഞാന്‍
വെടിമരുന്നുശാലയിലിരുന്ന്
ഒരു സിഗരറ്റിന്
തീ കൊളുത്തുകയാണ്‌
2013 ഡിസംബർ 4, ബുധനാഴ്‌ച
കുഴല്‍കിണര്‍
ക്വട്ടേഷനും സ്‌കെച്ചും
പഴഞ്ചന്‍
അവന്റെ
അയല്‍പക്കത്തെ
കുന്നുവാങ്ങി നിരപ്പാക്കി
ഒരു
കുഴല്‍കിണര്‍ കുഴിക്കുക
2013 ഡിസംബർ 3, ചൊവ്വാഴ്ച
കാറ്റില്‍നിന്ന് യുദ്ധമുണ്ടാക്കുന്ന വീട്‌
ചിത്രം മാഞ്ഞുപോയ
ശലഭങ്ങളോടൊപ്പം പോയാല്‍
കാറ്റില്‍ നിന്ന് യുദ്ധമുണ്ടാക്കുന്ന
വീട്ടിലെത്താം
പെയ്യാത്ത മേഘങ്ങളേ...
പെയ്യാത്ത മേഘങ്ങളേ
നിങ്ങള്‍
പൊട്ടിത്തെറിക്കാന്‍ വെമ്പുന്ന
അഗ്നിപര്‍വ്വതങ്ങെളെങ്കിലും
ആയിരുന്നെങ്കില്‍
ഞാന്‍ നിങ്ങളെ
സ്‌നേഹിക്കുമായിരുന്നു
2013 ഡിസംബർ 2, തിങ്കളാഴ്‌ച
ഞാന്‍ നിന്നെ ചുംബിക്കുമ്പോള്‍
ഞാന്‍ നിന്നെ
ചുംബിക്കുമ്പോള്‍
ഈ പ്രപഞ്ചത്തില്‍
പലതും സംഭവിക്കുന്നുണ്ട്
രണ്ട്
അഴുക്കുചാലുകള്‍
ഒന്നാവുന്നുണ്ട്
ശീതജലപ്രവാഹങ്ങള്‍
ഉഷ്ണജലപ്രവാഹവുമായി
ഐക്യപ്പെടുന്നുണ്ട്
ലോകസമാധാനത്തിന്
ഒരു ചുംബനത്തിന്റെ
ദൈര്‍ഘ്യത്തോളം
സമയം
അടയാളപ്പെടുത്തുന്നുണ്ട്
മേഘക്കുരുക്കുരുക്കില്‍ നിന്ന്
സൂര്യന്‍
മെല്ലെ എത്തിനോക്കുന്നുണ്ട്
സ്‌ഫോടനങ്ങള്‍ക്കിടയില്‍
മൗനം
കനക്കുന്നുണ്ട്
മൗനത്തിന്റെ ചില്ലയില്‍
കിനാവുകള്‍
കൂടുകൂട്ടുന്നുണ്ട്
കുഞ്ഞുങ്ങള്‍
വന്‍കരകള്‍ തമ്മിലൊരു
പാലം വരക്കുന്നുണ്ട്
ഞാന്‍ നിന്നെ
ചുംബിച്ചുക്കുമ്പോള്‍
ഈ പ്രപഞ്ചം
അങ്ങനെ പലതും
തെറ്റിദ്ധരിക്കുന്നുണ്ട്‌
2013 ഡിസംബർ 1, ഞായറാഴ്‌ച
അന്നൊരു പൊട്ടക്കിണറ്റില്‍ വച്ച്
അന്നൊരു-
പൊട്ടക്കിണറ്റില്‍ വച്ച്
എനിക്കൊരു
തക്കാളി തവളയെ കിട്ടി
അവള്‍ക്കൊരു
ബോണ്‍സായിയും
പൊട്ടക്കിണറ്റില്‍ വച്ച്
എനിക്കൊരു
തക്കാളി തവളയെ കിട്ടി
അവള്‍ക്കൊരു
ബോണ്‍സായിയും
2013 നവംബർ 21, വ്യാഴാഴ്‌ച
2013 നവംബർ 20, ബുധനാഴ്‌ച
മരുഭൂമിയില്‍ മഴ കലണ്ടര്‍ നോക്കുന്നില്ല
മീരയുടെ
കണ്ണുകളില്‍
വേനലുദിക്കുമ്പോള്‍
മരുഭൂമിയില്‍ ഇന്നലെ
ഒരു മഴ പെയ്തതായി
ഞാനറിയുന്നു
ആമഴയെ
ഞാന്‍
ഇങ്ങനെ വായിക്കുന്നു:
മരുഭൂമിയിലെ മഴയ്ക്ക്
വാഗ്ദാനങ്ങളില്ല
ബാധ്യതകളില്ല
വഴികളില്ല
അത് വഴിതെറ്റി വരുന്നു
വഴിതെറ്റി പോകുന്നു
മരുഭൂമിയിലെ മഴ
കലണ്ടര്‍ നോക്കുന്നില്ല
മരുഭൂമിയിലെ മഴ
ചിറാപുഞ്ചിയിയിലെ
മഴ പോലെ
അല്ല;
പെയ്യുന്തോറും അത്
ആരും നനയാത്തിരിക്കുന്നില്ല
മരുഭൂമിയില്‍
മഴ പെയ്താല്‍ മാത്രം മുളക്കുന്ന-
വിത്തുകളുടെ
കാത്തിരിപ്പില്ല
പ്രാര്‍ത്ഥനയില്ല
മരുഭൂമിയില്‍ മഴപെയ്യുമ്പോള്‍
മണല്‍തരികളും
മഴത്തുള്ളികളും
ഒറ്റമരം
മരുഭൂമിയിലെ മഴ
മറ്റൊരു മഴവരെ
തോരുന്നില്ല
മീര ഇപ്പോള്‍
മഴ മരിച്ചുപോയ
മണ്ണോ പെണ്ണോ അല്ല
അവള്‍ മാത്രമാണ്
മഴ നനയുന്നത്..
2013 നവംബർ 14, വ്യാഴാഴ്‌ച
ബക്കറ്റ്‌
കലാപങ്ങളുടെ അന്ത്യത്തില്‍
കുറെ ബക്കറ്റുകള്‍ പിറവിയെടുക്കും
അതില്‍ വിഷം നിറക്കപ്പെടും
അവ ദേശങ്ങളും ഭാഷകളും കടന്ന്
ഓരോ ഉമ്മറപ്പടിയും കയറിയിറങ്ങും
അപ്പോഴേക്കും
ആകാശം പിന്നെയും ഇരുളും
2013 നവംബർ 13, ബുധനാഴ്‌ച
കിനാവുകളുടെ കര്‍ഫ്യൂ
സ്വപ്നങ്ങള്‍ വില്‍ക്കുന്ന തെരുവില്‍
കര്‍ഫ്യൂ തുടരുകയാണെങ്കില്‍
നേരെ
കുഞ്ഞുങ്ങളുടെ-
ശ്മശാനത്തിലേക്കു പോവുക
ആകാശത്തിനും കടലിനും ഇടയിലൂടെ..
വേരുകള്‍
ഇല്ലായിരുന്നെങ്കില്‍
ഞാന്‍
നീലാകാശത്ത്
ചിത്രശലഭങ്ങളോടൊപ്പം
പറക്കുമായിരുന്നു
ചില്ലകള്‍
ഇല്ലായിരുന്നെങ്കില്‍
ഞാന്‍
കടലിന്റെ
അഗാധതയില്‍
മത്സ്യകന്യകയോടൊപ്പം
ശയിക്കുമായിരുന്നു
വാക്കേ വാക്കേ...
1
ചില വാക്കുകള്‍
ചെറുപ്പത്തിലേ നാടുവിട്ട
മക്കളെ പോലെയാണ്
ചിലത് ദേശാടനം കഴിഞ്ഞ്
ദരിദ്രനോ ധനാഢ്യനോ ആയി
തിരിച്ചെത്തും
മറ്റുചിലത് അജ്ഞാത ജഡങ്ങളായി
പൊതുശ്മശാനങ്ങളില്‍
അടക്കപ്പെടും
2
വാക്കേ വാക്കേ
ഞാന്‍ ചാറ്റാനോ തൂറ്റാനോ
പോകുന്ന നേരം നോക്കി
കയറുപൊട്ടിച്ച്
പുറത്തിറങ്ങി
പുകിലുണ്ടാക്കല്ലേ...
ഞാനറിയാതെ..
ഞാന്‍
ഗാഢ നിദ്രയിലാണ്ടുപോകുന്ന-
നേരത്ത്
ഞാനറിയാതെ
നീയെന്റെ
മസ്തിഷ്‌ക്കം തുരക്കണം
മനസ്സിലേക്ക് കടക്കണം
സ്വപ്നമായി മാറണം
കണ്ണടക്കുമ്പോള്‍...
കണ്ണടക്കുമ്പോള്‍
കാണാം
തലക്കുമീതെ
കടല്‍
കീഴെ
ആകാശം
ഇടയില്‍
വായിച്ചാലും വായിച്ചാലും
തീരാത്ത
മരുഭൂമി
എങ്ങനെയും വായിക്കാനാവുന്ന വചനങ്ങള്‍
ജാരന്‍
ഒരേസമയം
വില്ലനും നായകനുമാണ്
അവന്റെ കണ്ണുകളില്‍
എങ്ങനെയും
വായിക്കാവുന്ന
വചനങ്ങളുണ്ട്
വഴിയാധാരം
വഴിയേ വഴിയേ
ഇനിയും
നിനക്ക് വഴിപ്പെടാന്‍
എനിക്കു മനസ്സില്ല
എന്നെ വഴിയാധാരമാക്കൂ
എല്ലാ വഴികളും പുറപ്പെടുന്നത്
പെരുവഴിയില്‍ നിന്നാണ്
വഴിയാധാരമായവനെ
അവിടെ സ്വന്തം വഴി
കാത്തുനില്‍ക്കുന്നുണ്ടാവും
ഇതിനായി സബ്‌സ്ക്രൈബ് ചെയ്ത:
പോസ്റ്റുകള്‍ (Atom)