നാരങ്ങമിഠായി ഉണ്ടാക്കുന്ന വിധം

പുതപ്പുരിയപ്പെട്ട
രാതികള്‍
പുതച്ചുകിടത്തിയ 
പകലുകള്‍

അതെ,
അതൊരു-
പുതപ്പു മാത്രമായിരുന്നു

കലാപങ്ങളെ
ഇങ്ങനെയും എഡിറ്റു ചെയ്യാം

ഇങ്ങനെയും ചിതയൊരുക്കാം

അവര്‍
പൂട്ട് പൊളിച്ച്‌ അകത്തു കയറുകയോ
തേടിവന്ന് വാതിലില്‍ മുട്ടുകയോ
ചെയ്തിരുന്നില്ല;
നമ്മള്‍
അന്വേഷിച്ചു കണ്ടെത്തുകയായിരുന്നു

അതിനാല്‍
ഈയാമ്പാറ്റകളെ 
ഇനിമുതല്‍
വിഡ്ഢികളെന്ന് വിളിക്കരുത്

കുപ്പായമില്ലാത്ത കാലത്ത്...

കുപ്പായങ്ങള്‍
നരക്കും
കീറും
അഴിക്കാത്തപക്ഷം 
താനേ അഴിയും
അതിനാല്‍
കുപ്പായങ്ങള്‍ തമ്മിലുള്ളതിനെ 
ഞാന്‍ പ്രണയമെന്നു വിളിക്കുന്നില്ല

കുപ്പായമില്ലാത്ത ഞാന്‍
കുപ്പായമിട്ട നീന്നോടൊപ്പമില്ലെങ്കിലും
കുപ്പായമില്ലാത്ത നീ
കുപ്പായമിട്ട എന്നോടൊപ്പമില്ലെങ്കിലും
ഞാനതിനെ 
വിരഹമെന്നും വിളിക്കില്ല

കുപ്പായമില്ലാത്ത കാലത്ത്
നാമിരുവരുമൊന്നിച്ചൊരു-
പൂവിന്റെ 
കണ്ണില്‍ നോക്കിയിരിക്കുകയാണെങ്കില്‍ 
മറ്റാരെങ്കിലുമതിനെ
പ്രണയമെന്നു വിളിക്കട്ടെ