ഒമര് ഖയ്യാം
നീ ഇപ്പോള്
പടിയിറങ്ങണം
എന്റെ
ആര്ത്തിയും ആസക്തിയും
നിര്വ്വീര്യമാക്കി
ഇനിയും നിന്നെ സഹിക്കാന്
എനിക്കാവില്ല
പൂമുഖത്തെ
കസേരയിലോ കണ്ണാടിക്കൂട്ടിലോ
എത്രകാലം വേണമെങ്കിലും
നിനക്ക് അലങ്കാരമാകാമായിരുന്നു
പക്ഷെ; നീ
അക്കങ്ങള് മാത്രം വേവുന്ന
എന്റെ അടുക്കളയില്
പ്രണയത്തിന്റെ അടുപ്പുകൂട്ടി
ശീതീകരിച്ചതും മാംസളവുമായ
എന്റെ കിടപ്പറ
വിരഹത്തിന്റെ വറചട്ടിയാക്കി
കണ്ണുരുട്ടുന്നവന്റെ
തലയെടുക്കാന് കരുതിവെച്ച
വെടിമരുന്നു നീ
വീഞ്ഞാക്കി മാറ്റി
എന്നെ കുടിപ്പിച്ചു
ഉന്മത്തനായ ഞാനിന്ന്
ഒരു വെടിക്കു
മരുന്നില്ലാത്തവന്
ഒമര് ഖയ്യാം
ഇത് എന്റെ മാത്രം വീടാണ്
നീ ഇനിയും പുറപ്പെടാത്ത പക്ഷം
പാളം തെറ്റിയ ഒരു തീവണ്ടിയോട്
ഇതുവഴി വരാന് ഞാന് പറയും
2 അഭിപ്രായങ്ങൾ:
beautiful
nice one
ഒരു അഭിപ്രായം പോസ്റ്റ് ചെയ്യൂ